http://elraees.com/index.php/mian/writers/item/2446
بقلم اللواء : نبيل أبو النجا
بصعوبة بالغة تنهد التنبل وتثاءب وصاح
بعنترية في زميله الذي يجلس بجواره ولم يحرك ساكنا منذ أمس : ياخويا الواحد
كل يوم بيحس إن احنا اجدع من الناس اللي ماسكين البلد دول, تعرف انا تعبت
أوي امبارح ورحت لغاية التليفزيون وفتحته لاقيت اتنين كبارات قاعدين شتيمة
في بعض وكل واحد بيصرخ في التاني, آل إيه مستشار من بتوع الريس اتشال وهوه
بيقول لأ أنا اللي مشيت وليه ماانتو عندكوا واحد واحدة إعلامية بتقول إنه
جوزي وهوه بيقول لأ ماحصلش واشمعنا بقه واحد يتشال والتاني يتكافئ وفين
العدل وكلام كتير مافهمتش منه حاجة غير إن البلد غرقانة والناس ماسكه في
بعض تقطيع وسايبين الدنيا عدم.
رد التنبل وهو أحد رموز حزب التنابلة
النابهة: طبعا لأن الناس دول موش فاهمين حاجة, طيب احنا كسلانين وما بنعملش
حاجة وموش حانعمل حاجة وواضحين لكن دوله همه ماتعرفلهمش لون ولا حاجة
خالص, وعلى فكرة أنا واحد قريبي موش تنبل زينا زارني امبارح وقاللي ياخويا
الجوامع في الفجر فاضية خالص امال الناس إياهم فين؟ هوه كلام وصريخ وشعارات
وخلاص, هوه كام بق وكام منظر وبس, عاوزين إيه تاني البلد خربانة ومحافظات
بتقول عصيان مدني ومحافظات ماعدش فيها نفس تتكلم وبني آدمين ماشية على كف
الرحمان موش عارفه تعمل إيه ولا فيه إيه.
قاطعة بحده تنبل آخر قائلا هوه إيه يعني
عصيان مدني؟! ماتزعلش مني لإنه في الحقيقة البلد فيها بتاع أربعين مليون
أمي ما بيعرفوش حاجة غير كل همهم الأكل والشرب والخلفة والواحد فيهم يبصم
بالعشرة لأي حد يجيبله دقيق وسمنة وسكر وزيت والذي منه, إمال الإنتخابات دي
بينجحوا فيها إزاي ياعم؟ المهم ياصاحبي نورني الله يخليك يعني إيه عصيان
مدني؟
قال له شوف ياجاهل, العصيان المدني ده
يعني الناس ما تنفذشي اوامر الدولة وتعليماتها وماتشتغلش...صرخ التنبل
مقاطعا ياخرابي يعني حاييجوا ياخدونا ويحبسونا علشان احنا مابنشتغلش لإننا
تنابلة؟!! طمأنه التنبل الآخر وقال له ماتخافش البلد كلها مابتشتغلش هوه
فيه حد شايف شغله ولو كان حد شايف شغله كان بأه ده حال البلد, ده كل واحد
عاوز مكتب وشقة على النيل وعربية أبهه وفلوس من غير مايتعب ولا يعمل حاجة,
إنما الناس بتاعت العصيان المدني دي ناس سابت كل حاجة وماحدش ينزل الشارع
يعمل حاجة وتبقى البلد مهجورة ويتوقف الحال خالص.
ضحك تنبل لئيم وقال هوه يعني الحال كان
ماشي, وهوه يعني فيه أوامر وتعليمات للحكومة علشان تتنفذ ولا ما تتنفذشي دي
كل حاجة ياعم الحاج ماشية بقدرة قادر وبالدفع الذاتي لا حد عارف نعمل إيه
ولا مانعملش إيه ولا مين يعمل ومين مايعملش ومين المسئول ومين غير المسئول
يعني العملية سلطة ومافيش حد مالي عين حد وكل واحد على كيفه ياعمنا.
هنا صاح كبير التنابلة بنبرة يعلوها الفخر
والسعادة قائلا والله احنا اجدع ناس في الشعب ده لإننا عارفين سكتنا كويس
ومابنعملش حاجة لكن الجماعة المسئولين دول موش عارفين سكتهم وقاعدين مبوظين
الدنيا وعاوزين حد ييجي يسوق البلد, طيب اللي حايقوللي نقول إيه على
الجماعة دول حايبقى جدع, ياترى إيه اكتر من التنابلة؟
قال مساعد كبير التنابلة, أقول ياريس,
أقول ياريس, ناس خسارة فيهم الأكل والشرب وخسارة فيهم العيشة والله لو حد
فيهم بيحب البلد مايعمل فيها كده ده كل واحد كاره التاني وماعدش حد بيحب
بعض والعمر بيجري والأيام بتخلص وحانبقى تحت الأرض وضاع العمر ياولدي.
نهره كبير التنابلة وقال له ياخي ماتفولش علينا احنا قاعدين نتفرج وهمه قاعدين يتكلموا وإنشاء الله احنا وهمه في خبر كان.
ليست هناك تعليقات:
إرسال تعليق