http://www.elraees.com/index.php/mian/writers/item/2584
بقلم اللواء : نبيل أبو النجا
وكزه في جنبه قائلا "ياخويا ياتنبل هوه
المتغطي بيك عريان" ياخويا انت زي العدم, موش قلتلك كام مره افتح الهباب
التليفزيون ده وخلينا نعرف الدنيا الملخبطة دي فيها إيه ماسألتش فيه. رد
عليه التنبل ابن الكار وزميل الجماعة قائلا " بصراحة أنا مكسل ودي موش
جديدة علينا وقلت في عقل بالي إنك هاتفهم إن احنا جماعة بتاعة كلام وبس
وإنشاء الله كل حاجة حاتبقى فلة!!
ظهر على شاشة التلفاز الإعلامي الشهير
عمرو الليثي على قناة المحور التي كانت تنقل حصريا اجتماعات الحزب الوطني
الديمقراطي المنحل وسبحان مغير الأحوال من حال إلى حال والدنيا ماشية وكلها
أرزاق وفهلوة وشطارة, البث كان المفروض الساعة 8 مساءا لكن احتراما
للمشاهدين وإمعانا في الإنضباط خاصة أن اللقاء كان مع الكبير وهو دائم
القدوة والمثل في كل شئ علشان كده الدنيا مزهزه وحلوة خالص والناس حاتموت
من الفرحة والسعادة!! وتم بث البرنامج بعد الموعد المحدد مع الكبير بحوالي
خمس ساعات!!
التنبل النور (الشاطر) قال لزميله, معلهش
ياتنبل ياخويا عليه شوية علشان نسمع الكبير ونستمتع, اندهش التنيل وقال
لزميله انت عاوزني اتحرك يابجم, انت بتطلب مني أكون مخالف للجماعة, ادعي
ربنا يمكن يعلى لوحده وانت دعاؤك مستجاب. فجأة ظهرت كرامات التنبل ودوى صوت
المذيع الليثي وهو يقول للكبير "يا كبير, رفاق الوطن من الأقباط يشكرونك
على تغيير ميعاد الإنتخابات النيابية لأن الموعد الأول المحدد كان وقت
أعياد الأقباط".
رد الكبير قائلا "مؤسسة الرئاسة لم تكن
تعلم أن هذا الموعد هو موعد احتفالات وأعياد الأقباط, ولكن عندما أرسلت
الكنيسة إلى الرئاسة لإحاطتها علما استجابت الرئاسة فورا ولم تدخر وسعا في
تلبية طلب إخواننا الأقباط !!!
صاح تنبل متبلد الحس وشكله كده بجم على
شاكلتهم كلهم "إذا كانت مؤسسة الرئاسة ماتعرفش المناسبات والأعياد إمال
تعرف إيه, والله ياخوفي يكونوا مايعرفوش حاجة خالص ويغرقوا البلد أكثر
ماهيه غرقانة, يا عالم ياهوه, امال المشاكل العويصة زي الأمن والمرور
والزبالة والقراية والكتابة والفقر والصحة حايعملوا فيها إيه؟".
رد التنبل النور (الشاطر) قائلا "هوه فيه
إيه, يعني حرام الناس دي تغلط وتعترف بغلطها, مؤسسة وماعرفتش إن التاريخ ده
أعياد للأقباط, حصل إيه يعني, المرة الجايه كل واحد في المؤسسة دي يجيب
مفكرة ونوته عليها التواريخ علشان كل حاجة تمشي صح وطبعا دي مؤسسة كبيرة
أوي وعندها فلوس وتقدر تعمل كل حاجة, انا موش عارف انتوا ماسكين على
الواحدة ليه؟"
التنبل المدهول صاح قائلا " انا عندي
فكرة, يجيبوا مدرس خصوصي للمؤسسة دي يعلمهم التواريخ والمواعيد وأنا أعرف
واحد كان أبويا دايما بيقول عليه بيعلم في المتبلم ويصبح ناسي" أوعوا
تجيبوا الراجل ده أحسن يطينها أكتر ماهي مطينة.
وراح جميع التنابلة في سبات عميق استكمالا
لمسيرة الكسل والشعارات بلا عمل وطبعا النوم ده مفيد للي زيهم لأن قللتهم
أحسن ووجودهم زي عدمه وعمار يامصر يا أم الدنيا.
ليست هناك تعليقات:
إرسال تعليق