بقلم اللواء : نبيل أبو النجا *
صاح كبيرالتنابلة في جماعته بصوت جهوري
"كل واحد يتعدل في قعدته وينزل رجليه من على الكنبة ويعدل نفسه علشان في
اجتماع للجماعة كلها" مفهوم يابجم انت وهوه؟
رد تنبل مدوحر في نبرة حادة "انت عاوزنا
نتعدل ياكبير, هوه انت موش عارفنا وانت الكبير بتاعنا, ده احنا مستحيل
نتعدل, داحنا دماغنا زي اللي في رجلك, ونتعدل ليه ماحنا قعدنا خلاص وحانخرب
تلها", إذا كنت عاوز تقول حاجة قول واتعدل انت بس خلي كلامك موش عوج, عاوز
إيه بالضبط؟ هوه عاد فيه حاجة تتعاز اليومين دول غير ستر ربنا عشان بلدنا
ماتتفضحش أكتر من كده.
في عصبية شديدة وبلهجة حادة صاح الكبير
"ياتنبل يامدوحر بلاش فلسفة وحياة أبوك, اعدل نفسك واكلم كويس احسن والله
ارفدك من الجماعة", احنا عاوزين نشوف حل للفوضى اللي في البلد دي, احنا
صحيح تنابلة لكن برضه دي بلدنا وخايفين عليها.
رد تنبل مفرفش حبتين"بإمارة إيه خايفين
عليها, هوه اللي بيحب بلده يعمل فيها كده, دي جماعتنا عملت فيها اللي
ماعملوش حد من أيام الفراعنة لحد دلوقتي, ياما إستعمار إيشي هكسوسي وروماني
وصليبي وإنجليزي وفرنساوي وعلى كل لون ياباتستا, وماحدش دمر مصر ولا وصلها
للي وصلنالوا دلوقتي, ده كل حاجة خربانة وكل واحد بيكره التاني وماحدش
عاوز يعمل حاجة وكله منتظر المهدي المنتظر وكله عاوز وخلاص وتتحرق مصر,
إيشي عصيان مدني وإيشي عصيان شرطي وإيشي قطع طرق وسكة حديد وإغلاق التحرير
والمجمع وحصار الدستورية العالية وحصار البتاعة دي بتاعة الإنتاج الإعلامي,
وشوفت ياخويا صورة في الجرنال امبارح لإتنين بيقولوا عليهم ثوار مصورين
وحاطين مصد حديد قافلين بيه شارع في التحرير, معقول فيه بلد في الدنيا فيها
الهرجلة دي ومافيش حكومة ومافيش حد بيأدب حد".
كان فيه تنبل موش معبر التنبل المفرفش
وقاعد يعمل طيارة ورق وهوه بيتكلم وبعد ما خلص قال" اللي موش عاجبه يخبط
راسه في الحيط, هوه احنا كده موش اجدع من أيام زمان بتاع الراجل اللي راح
في السجن دلوقتي, كنا موش عارفين نفلفص وبعدين طلعنا على وش الدنيا, سيبونا
نتمنجه شوية ونشوف احترامات وأيام عز, إيه رأيكم أنا كل يوم جاي لي ناس
عاوزيني أتوسط لهم علشان يستوظفوا وحاسس إن أنا مهم خالص بعد ماكنش لي أي
صفة “.
رد تنبل مسطول بسخرية "طيب يا خويا كان
لازمته إيه بقه الثورة وغيره لما هانرجع زي زمان كل حاجة واسطة ومحسوبية
وكرامات", بدلنا التنابلة بتنابلة تانيين وكأنك ياأبوزيد ماغزيت, والله
ياجماعة لو إني فايق موش مسطول كنت قلتلكم إن البلد دي عاوزه واحد شارب من
.......يمشيها على العجين ماتلخبطوش ويحكمها بالحديد والنار لإن فيه ناس
بيجمعها مزمار وناس بتفرقها عصا, بس يكون نظيف ومابيسرقش ولا بيكذب ولا
بيعين ولاده في وظايف أبهة غير التانيين زمايله, ومابيعرفش حد في الحق.
رد التنبل الظريف "يمشيها على العجين
ماتلخبطوش...هاهاها" الحمد لله إحنا تنابلة موش بنمشي يعني ماحدش حايقدر
يمشينا ولا بالطبل البلدي, انتوا عارفين الخفاش لما بيلزق, أهو احنا جماعة
التنابلة كده وسلمولي على العجين.http://www.elraees.com/index.php/mian/writers/item/2666
ليست هناك تعليقات:
إرسال تعليق