http://www.elraees.com/index.php/nabielaboelnaga/item/3758
تنابلة السلطان...الواقع والخيال (12)
بقلم : اللواء نبيل أبو النجا *
بعد أن استيقظ التنبل البديع وأخذ يتثاءب
وهو يندب حظه على أنه لم ينم غير ثلاثة أيام متتالية قال في صوت جهوري ينم
عن شخصية قوية حازمة متمكنة: "يا تنابلة أنا نمت شوية صغيرين وصحيت وعاوز
أفهمكم يا بجم انت وهوه يعني إيه ثورة مضادة ؟".
رد التنبل الشاطر النّور: "مضادة يعني خلف
خلاف وعكس عكاس" وعلى فكرة فيه كمان مضادة للطائرات والدبابات, أنا سمعتها
لما كنت في الجيش, أظن كده بأه أنا شاطر وبعديك علطول يا تنبل يا بديع في
المنزلة الدنيوية وطبعا في الآخرة كمان.
استطرد التنبل البديع قائلا :" والله يا
تنبل يا شاطر انت زي الفل ومخك مفتح وبتعرف التايهة", عموما الثورة المضادة
يا تنابلة دي أمرها سهل خالص, كل واحد بيعارضنا هوه عضو ثورة مضادة.
قاطعة التنبل المدوحر: "يعني احنا في
ناحية وهمه في ناحية يا بديع؟", أنا شايف كل الناس موش عاجبها الحال والحال
واقف والدنيا في بلدنا وحشة خالص والناس موش لاقية, يعني كل الشعب نسميه
ثورة مضادة, ومضادة لمين؟ هوه احنا قمنا بثورة؟ والله أنا فاكر احنا ما
تحركنا من مكاننا لغاية ما بان إن الدنيا بقت فل والراجل اللي فات مشي
والتعلب فات فات وفي ديله سبع لفات!!
قال التنبل البديع في زهو وخيلاء: "احنا
اللي على الكرسي, والحاكم بأمره واحنا اصحاب كل حاجة, اصحاب الثورة واصحاب
بعض وصاحب صاحبك يبقى صاحبي", واللي موش حايسمع الكلام حايبقى فلول علطول
وثورة مضادة وخاين وحانحاصر كل مكان حد يتنفس فيه علشان نقضي على الفتنة
والخروج على الشرعية والقانون.
قاطعه التنبل الشاطر سريعا قائلا: "
والنبي بلاش القانون ده يا بديع, أحسن الناس بتوعه كلهم بقوا ثورة مضادة"
خلينا نتكلم كلام ما حدش ياخد علينا حاجة خلينا معششين ودافيانين واحنا
داخلين على الضلمة .. قصدي على الصيف.
" طيب يا شاطر" وافقه التنبل البديع
واستطرد قائلا ": خليها الخروج على الشرعية والدستور, لكن الدستور احنا
اللي حاطيناه يعني الناس موش حا توافقنا برضه, طيب اعمل إيه وأنا تنبل ابن
تنبل ومن جماعة التنابلة يعني لا حول لنا ولا قوة وإنشاء الله تفرج.
قال التنبل المدوحر: "أنا كلفت حد يدور عن
حد ما هواش ثورة مضادة ما فيش حد, كلهم ثورة مضادة", يعني احنا بس الثورة
والفكر والحكم وهمه ثورة مضادة, احنا على حق وهمه كلهم على باطل ولازم
يوقفوا عند حدهم يا إما نحاصرهم, دول عاوزين يخربوا البلد, لو انها موش
ناقصة خراب وموش ممكن تخرب عن كده.
قال التنبل البديع: "الثورة المضادة موش
عاوزين انتخابات مجلس الشعب علشان البلد تتأخر وما تتقدمش", لكن ده بعدهم
إحنا مستمرين مستمرين ليوم الدين.
قاطعة التنبل الشاطر النور: " هوه مجلس
الشعب ده موش حا يكلف البلد ملايين الملايين, بدلات ورواتب وسيارات وجلسات
وحصانات وسفريات", إهو احنا ما عملناهوش لغاية دلوقتي والبلد ماشية زي ما
هية وبلدنا ماشية لوحدها بقدرة قادر بالدفع الذاتي وموش عاوزه مفهومية ده
كل حاجة فلة والآشية معدن والحمد لله.
رد عليه التنبل المدوحر:" والله يا شاطر
ما في لازمه لأي حد فينا, إحنا تنابلة متأصلين, صحيح لنا فروع بره وفي بلاد
كتيرة لكن الأصل هنا يا تنبل يا خويا وعلى الأصل دور", آدي احنا سايبينها
تغرق وما حدش له دعوة بحاجة وكل مكان في بلدنا ركبناه والحمد لله وسوق يا
...شاطر وافتح عالرابع ده انت عندك تنبل بديع قاعد جنبك منور وكان قبل كده
صاحب "طظ" وكلهم جهابذة والعين عليهم والقلب داعيلهم وربنا يحفظهم من
الثورة المضادة ويقوي إيمانهم كمان وكمان.
أجابه التنبل الشاطر: "بكره يا مدوحر تشوف
البلد دي حا تبقى عامله إزاي", اقتصاد وأمن ومرور وانتعاش ورفاهية وتعليم
وكل حاجة, إحنا ناس نضاف وزي الصيني بعد غسيله ومتواضعين وعندنا قناعة
وكفاية حب الناس لينا.
أدار جميع التنابلة وجوههم ناحية الحيطة
اللي هيه زيهم وانفجروا في الضحك, وقال أحدهم ولا أريد أن أذكر اسمه لأنهم
سيتهمونه بالثورة المضادة "ده كله ممكن يحصل لما الثورة المضادة دي كلها
تموت يعني الشعب كله يموت ما عدا احنا".
-----------------------------------
* لواء متقاعد - وحدات الصاعقة
-----------------------------------
* لواء متقاعد - وحدات الصاعقة
ليست هناك تعليقات:
إرسال تعليق