http://elraees.com/index.php/nabielaboelnaga/item/3090
بقلم : اللواء نبيل أبو النجا*
واحد من الإخوان التنابلة قال لزميله في
نشاط يحسد عليه " ياخويا لما احنا مامنناش فايده, ما نسيب الكراسي اللي
قاعدة علينا قصدي اللي احنا مرزوعين عليها لناس تانية موش من جماعة
التنابلة بتاعتنا يمكن يظبطوا الدنيا ؟".
رد التنل الآخر الأبله "داحنا بقالنا سنين مستنيين نركب تقوم تقوللي ننزل, داحنا موش حانسيب ولا بالطبل البلدي, ونسيب ليه ياخويا, مااحنا قاعدين ليل مع نهار ندعي ربنا يصلح الدنيا, ومافيش حد يقدر يقعد ومايتحركش زي التنابلة اللي همه احنا, وإنشاء الله ربنا حايكرمنا آخر كرم لإن احنا مابنعصيهوش, صحيح بنكذب حبتين ومكسلين تلت حبات ومكوشين اربع حبات لكن الله غفور رحيم".
صاح التنبل الشاطر "النور" الله يفتح عليك ياخويا, احنا كمان حانعمل البتاعة اللي بيقولوا عليها دي ميلزما واللا ميليشيا عشان نحرس البلد من الكفرة والشياطين والفلول". قاطعة محتدا تنبل قاعد جنبه قائلا " إلا الفلول دول موش همه ياشاطر ياخويا اللي بيبيعوا الفل عند إشارات المرور, دول زاحمين الدنيا وهمه اللي معطلين المرور في بلدنا".
قال له التنبل الشاطر " انت على فكرة احسن واحد فينا لإن احنا تنابلة بس إنما انت بقيت تنبل وجاهل كمان", ياجاهل الفلول دول همه اللي كانوا مع النظام اللي فات وراح وراحت أيامه" وهمه دلوقت اللي بيخربوا في البلد وعاوزين يولعوها علشان يرجعوا تاني, بس احنا واقفين لهم وطبعا وقفتنا دي على حساب راحتنا لإن احنا كده حانتعب وعاوزين نستريح.م شوية, الناس قاعده بتهاجمنا من كل ناحية وبتقول ليه الحقيقة مابتظهرش دايما بعد احنا ماركبنا الكراسي, يعني مثلا ولاد مصر اللي راحوا في رفح في رمضان اللي فات, مين اللي قتلهم وليه وفين الإنتقام؟".
قال التنبل المتحدث باسم الجماعة " فيه ناس في سينا بيقولوا عليهم الجهاديين همه السبب", والله انا موش عارف ليه بيعملوا كده, همه موش كانوا عايزين الشرع والشريعة واحنا جماعة بتنفذ كل ده طب ليه وليه يحرجونا قدام الخلق؟ دي مؤامرة ودسائس علشان يشيلونا ويجيبوا حد غيرنا وبيقولوا كمان إن احنا اللي عملنا كده عشان نشيل المشير ونخلص من المجلس العسكري ونبقى احنا بس اللي في الصورة لكن الناس الوحشين دول موش عارفين إنهم حايقدموا خدمة لينا لأن عملية شيلنا دي حلوة أوي ومريحة خالص لإن احنا تنابلة وموش بنتحرك ولازم نتشال.
صاح التنبل المفرفش "والله البلد دي حاتخسر حاجات كتير أوي لو شالونا, انتم موش شايفين الأمن والنظام والنظافة والمرور والتعليم والإقتصاد والدنيا كلها مزهزهة إزاي وفلة على الآخر, دا والله العظيم الناس في نعمة موش حاسه بيها موش عارف ليه وحايندموا آخر ندم لو شالونا ويقولوا ياريت يوم واحد من أيام التنابلة يرجع تاني, وطبعا موش حايرجع لأن التنابلة إذا راحوا لا سمح الله موشو حايرجعوا تاني لأنهم تنابلة".
صاح الكبير قائلا "يا جماعة خلي لسانكم حلو مع الناس وبلاش شتيمة وطظ وغيره لإن الناس بقت روحها في مناخيرها واتأدبوا شوية لإن منظرنا بقى وحش أوي" انتم ماسمعتوش قبل كده إن الواحد لازم يدعى غيره باللين واللطف ويكون سياسي محنك".
رد التنبل المفرفش " هيه ياخونا, الكبير بيتكلم حلو واظن محنك دي انجليزي يعني الكبير بتاعنا بيتكلم لغات وإنشاء الله حايشتغل مع الناس بتوع الكواكب والنجوم, ده دارس بره ياجماعة وإنشاء الله كل حاجة حاتتظبط تمام التمام بس انتوا ادعوا ربنا وهوه سبحانه اللي بيوزع الأرزاق.
تنبل مؤيدا " والله انت صح وعقلك كبير ولازم يعينوك رئيس وزرا, عارف ليه لإن في وسط النكد اللي احنا عايشين فيه دلوقتي لسه فيه واحد من الناس مفرفش, الله يغمك ياشيخ وعلى فكرة أنا بشك فيك إن انت بقيت علماني ومنشق عن الجماعة.
المفرفش "لا يمكن أنشق عن الجماعة موش عشان خايف من إهدار الدم ولكن لأن التنبلة في دمي وإنشاء الله حاوصل لمرحلة التناحة والتبلد زيكم كلكم ومهما يحصل احنا برده التنابلة جماعة بنحب بعض وبنحب بلدنا ومحافظين عليها في عينينا".
لفت نظر التنبل تنبل آخر " هوه انت موش يابعيد ضرير, حاتحافظ عليها إزاي وانت موش شايف حاجة خالص ولا أكن فيه حاجة, يمكن ربنا عوضك عن النظر بسمع قوي, انت بتسمع كتير لكن مابتعملش حاجة خالص ومهما اتقال لك برضه اللي في مخك في مخك" يعني لو حد شاف حال البلد حايقول علطول التنابلة دول جماعة منهم لله ولو كان عندهم حبة دم وشوية عقل كانوا سابوا الكراسي ونزلوا الشوارع والقرى وعملوا حاجات تنفع الناس".
قال الكبير " انت مهووس ياتنبل انت, انت موش عارف إن احنا عمرنا ماحانعمل حاجة خالص, احنا ندعي وربنا حايستجيب إنشاء الله" وخلي عندكم شوية تقوى ورحمة احسن بقى شكلكم وحش خالص وحالكم لا يسر عدو ولا حبيب.
* لواء متقاعد- وحدات الصاعقة
ليست هناك تعليقات:
إرسال تعليق